कपिल किशोर घिमिरे
सानो छु पक्कै ठुलो हुन्छु भोलि
पिताको सहारा लिँदै हिँड्छु भोलि
मलाई दिदी दाइले निकै साथ दिन्छन्
र आमा बुवाले सधैँ प्रेम गर्छन्।
१
निकै ज्ञान लिई म ज्ञानी हुनेछु
स्वदेशी धराको प्रतिज्ञा लिनेछु
सधैँ देश प्रेमी म आफू हुनेछु
विदेशी इसारा विरोधी हुनेछु।
२
मलाई छ प्यारो स्वदेशी धरा यो
म गर्ने छु खेती छ बाँझो गरा यो
म रोप्ने छु बाली गरी कर्म आफैँ
न ठान्नू छ सानो म गर्ने छु साँच्चै।
३
छ सानो कसैले मलाई नठान
म जे गर्छु साँचो र गर्ने छु प्रष्ट
जसै जन्मिएँ, यो धरा स्वर्ग ठानेँ
सबै भ्रष्ट फाल्नै छ यो सत्य जानेँ।
४
सबै मिल्नुपर्ने छ यो देश निम्ति
बुढा हुन् कि बच्चा मिले हुन्छ जाती
विदेशी कसैको नहौँ दास दासी
ल है नित्य हामी मिलौँ देश बासी।
५
न हुन् देश द्रोही न हुन् भ्रष्ट दास
उज्यालो बनाऔँ सुनौलो भविष्य
स्वदेशी धराको भलो गर्न निम्ति
सबै बाल बच्चा बनौँ खास ज्ञानी।
६
दाङ। हालः कैलाली