मीना चौँलागाई
आहा कति राम्रो मेरो पुतलीझैँ नाना
घुमीघुमी नाच्छु म त बजाइदेऊ गाना।
दसैँ आयो भनेर सबको मनमा रमाइलो
दिन पनि शरदको आहा कति घमाइलो।
कोरी बाटी चट्ट पर आमा भन्नुहुन्छ
मामाघर आउनु छिट्टै मामा भन्नुहुन्छ।
चिची र माम खाएर चट्ट राम्री भएर
रातो टीका लाउनुपर्छ मामाघर गएर।
दक्षिणा नि पाइन्छ चिची पनि खाइन्छ
नयाँ राम्रो नाना किनी फेरि फेरि लाइन्छ।
पुतली नि खुसी छे जामा लाउन पाएर
म त झनै खुसी छु मामाघरमा आएर।
कति राम्री भान्जी मेरी मामा भन्नुहुन्छ
भोलि घर फर्किनु छ आमा भन्नुहुन्छ।
अब अर्को दसैँमा नि रमाउँला यसरी
सबै साथीहरूलाई सम्झना छ बेसरी।
पाँचखाल, काभ्रे